“Rizbulojmë Parkun” me nxënësit e Shkolla Private “Elite” Tirane! Një ditë ndryshe për ne dhe të rinjtë, teksa së bashku shëtisim në Parkun e Pallatit të Brigadave, një nga veprat më të bukura të arkitekturës landscape, për t'u njohur me historikun dhe arkitekturën e godinës, me peisazhet dhe veprat e artit që gjenden brenda tij!

Duke ngritur foletë e zogjve në park, së bashku me nxënësit e Shkolla Jopublike KRISTAQ RAMA dhe ECO Tirana. Laboratori didaktik i foleve me material të ricikluar druri i ndihmon nxënësit që përveçse të ndërtojnë një shtëpi për zogjtë e parkut, ata të ndërgjegjësohen edhe në mbrojtjen e mjedisit. Po aq sa kontributi për një strehë të sigurt, për fëmijët ishte i rëndësishëm dhe informacioni për t'u njohur me llojet e shpendëve autoktonë në Parkun e Madh!

Jo vetëm një hapësirë e këndshme për foto, por dhe për ta shijuar ulur në barin e njomë nën pemët e gjelbëruara apo stolat përreth, pas një shëtitjeje të gjatë rrugicëzave të hijezuara nëpër park! Madje ka dhe një çezmë për t'u freskuar nga vapa e këtyre ditëve! Një sipërfaqe e rikualifikuar dhe e punuar me kujdes nga kolegët tanë të terrenit, si dhuratë për frekuentuesit e parkut.

Është pranverë, është koha për piknik! Dhe nxënësit e New York Basic Education e shijuan aq shumë ditën në Parkun e Liqenit të Farkës, shoqëruar me shumë lojëra, pikturë, krijimtari artistike. Sa më shumë kohë kalojmë në natyrë, aq më shumë lidhemi me të!

Natyra na frymëzon të gjithëve, por vogëlushët ca më shumë! E ku më mirë se në Parkun e Madh? Në vigjilje të Ditës Evropiane të Parqeve, fëmijët e QKKF shpalosën talentin e tyre në pikturë dhe interpretim instrumentash, duke dhuruar çaste të bukura edhe për frekuentuesit e parkut në këtë fundjavë të ngrohtë e me diell!

Nisëm fundjavën me yoga në natyrë, për një mendje, shpirt dhe trup të shëndetshëm me instruktor Klodian Muratin! Meqë tashmë jemi në ditë të nxehta dhe me diell kemi edhe një arsye më shumë për të praktikuar yoga në Parkun e Madh të Liqenit, aty ku era na përkëdhel lehtësisht, ku dëgjojmë cicërimat e zogjve dhe mbi të gjitha jemi në ajër të pastër!