parku rinia foto e re web

“Parku Rinia” është parku publik qendror i kryeqytetit, konceptuar në 1931 dhe ndërtuar në vitin 1949, që mbulon një sipërfaqe prej 29.81 ha. Për qendrën e Tiranës u hartuan disa variante projektesh, të cilat pavarësisht nga ndryshimet që pësuan deri në realizim, kishin në bosht aksin e bulevardit ku kryqëzoheshin të gjitha rrugët e qytetit, vend që asokohe ishte hapësirë e zbrazët. Projekti i parë nis që në 1923, por varianti më i suksesshmëm, në përshtatje me ambiciet e Mbretit Zog për ta bërë Tiranën një qytet modern europian, daton në 1931 dhe mban firmën e arkitektëve italianë Brasini dhe De Fausto. Sipas këtij plani, u ndërtua kompleksi i ministrive, Bashkia e Tiranës, Banka Kombëtare, lulishtja e këtij kompleksi qëndror, sheshi qëndror me shatërvanin si dhe ajo që sot njihet si “Parku Rinia”.

Ndërsa natën e 28 Nëntorit ‘49, duke u gdhirë Dita e Çlirimit, me punë vullnetare u pyllëzua parku nga të rinjtë tiranas, aksion që i dha emrin që mban edhe sot “Parku Rinia”. Me rastin e festimeve të Pesë-vjetorit të Çlirimit në vendin e projektuar për park, bleronte tani një pyll madhështor eukaliptesh, plepash e akaciesh. Ky park gjatë dyzet viteve të parë është parë si një hapësirë relativisht e lirë për të rinjtë e Tiranës, si dhe zonë e gjelbër për familjet dhe fëmijët. Më vonë aty u ndërtua një kompleks kafene dhe restorante, duke e quajtur me ironi “Taiwan”.

Në vitin 1991, pas rrëzimit të komunizmit, Parkun Rinia e mbuluan ndërtimet ilegale, shumica e këtyre objekteve ishin kioska, bare dhe restorante, dhe parku u bë i njohur si vatër e papastërtisë dhe krimit në Tiranë. Gjatë pastrimit të qytetit në vitin 2000, këto ndërtesa u rrafshuan dhe parku u rehabilitua në të gjithë sipërfaqen. U shkatërruan 130 ndërtesa dhe u hoqën mbi 45.000 m3 mbeturina.

Sot Parku Rinia ka një sipërfaqe prej 29.81 ha me hapësira të gjelbra, edhe një reliev të ndryshëm në sipërfaqe të caktuara, çka shërben jo vetëm si një mur akustik, por nxit  edhe aktivitete fizike për fëmijët. Krahas një hapësire të veçantë që i është dedikuar atyre që dëshirojnë të luajnë me katërputroshët, janë krijuar mini-sheshe për fëmijë e të moshuar.

Ky park i ka kaluar APR-së nën administrim me VKB nr.49 datë 26/04/2018.

 

Parku Rinia nga Qershori 2020

 

Në Korrik 2019 nisën punimet për transformimin e Parkut Rinia dhe kthimin e tij në një hapësirë çlodhëse për të gjitha moshat. Një Qershori 2020, festa e vogëlushëve, solli për Tiranën edhe hapjen e parkut më të ri e më të bukur pas atij te liqeni. Shumë lojëra argëtuese, gjelbërim dhe mjedise çlodhëse për vogëlushët, prindërit, gjyshërit. Nuk i harruam as katërputroshët e dashur.